July 21, 2024

மண்ணில் இரசாயன உரங்கள் இடுவதை குறைத்து ஒருங்கிணைந்த நுண்ணூட்டச்சத்துகளை இடுதல் பயிற்சி

ஈரோடு, ஜூலை 5

ஈரோடு மாவட்டம், தாளவாடி வட்டாரம், வேளாண்மை – உழவர் நலத்துறை, வேளாண்மை தொழில்நுட்ப மேலாண்மை முகமை(அட்மா) திட்டம் மூலம் 2024-25 ஆம் ஆண்டுக்கான உள் மாவட்ட அளவிலான விவசாயிகள் பயிற்சியானது மண்ணில் இரசாயன உரங்கள் இடுவதை குறைத்து ஒருங்கிணைந்த நுண்ணூட்டச்சத்துகளை இடுதல் குறித்து திகானரை கிராமத்தில் நடைபெற்றது. இதில் தாளவாடி வட்டார வேளாண்மை அலுவலர் து.விஜய்பாபு தலைமை தாங்கினார்.

இப்பயிற்சியில் கோபிசெட்டிபாளையம், மைராடா-வேளாண் அறிவியல் நிலைய விஞ்ஞானி பச்சையப்பன், கலந்துகொண்டு மண்ணில் அதிகப்படியான இரசாயன உரங்கள் இடுவதால் ஏற்படும் பாதிப்பு குறித்தும், அதை எவ்வாறு முறையாக இடுவது, பாதிப்பை எவ்வாறு நுண்ணூட்ட சத்துக்கள் இடுவதால் குறையும் என்பது குறித்து தெளிவாகவும், விளக்கமாகவும் விவசாயிகளுக்கு எடுத்துக் கூறினார். மேலும் மண்ணில் நுண்ணூட்ட சத்துகள் இடுவதால் ஏற்படும் பயன், எந்த பயிர்களுக்கு எந்த மாதிரி நுண்ணூட்டகலவைகள் இட வேண்டும் என்பது குறித்தும் விவசாயிகளுக்கு எடுத்துக்கூறினர்.

பின் வேளாண்மை அலுவலர் து.விஜய்பாபு, கலைஞர் திட்டத்தில் வழங்கப்படும் மானிய திட்டங்கள் குறித்தும், சொட்டுநீர், தெளிப்புநீர், ளுறுஆயு மானிய விபரங்கள் குறித்தும், உழவன் செயலி, இ-நாம், இ-டிரேடிங், டிரோன் மூலம் தெளிப்பு செய்தல், கிரெய்ன்ஸ் ஆகிய திட்டங்கள் குறித்தும், வேளாண்மை-உழவர் நலத்துறையின் மானிய திட்டங்கள் குறித்தும் விவசாயிகளுக்கு தெரிவித்தனர். இப்பயிற்சியில் அப்பகுதி உதவி வேளாண்மை அலுவலர் பவன்குமார், உதவி தோட்டக்கலை அலுவலர் ஐயப்பன் ஆகியோர் கலந்து கொண்டு விவசாயிகளுக்கு பயிற்சி அளித்தனர். இப்பயிற்சிக்கான ஏற்பாடுகளை அட்மா திட்ட உதவி தொழில்நுட்ப மேலாளர் ரமேஷ் செய்திருந்தார். இதில் திகனாரை, கரளவாடி பகுதியை சார்ந்த 40 விவசாயிகள் கலந்து கொண்டனர்.

Spread the love